Teacher by profession, writer by passion, poet by feelings...!

❤️

?

#kavyotsav

કવિતા એટલે...
- જૈમીન ધામેચા

કવિતા એટલે
વણકહ્યાં વાક્યો,
જે વિખેરાય છે કાગળ પર !

કવિતા એટલે
લાજવાબ લાગણીઓ,
જે સંતાકૂકડી રમતી રહે છે શબ્દો પાછળ !

કવિતા એટલે
ધીમું સ્મિત,
જે ફરકતું રહે છે દરેક પંક્તિના છેડે !

કવિતા એટલે
અલ્લડ આંસુઓ,
જે સમેટાય છે અલ્પવિરામના ખોળે !

કવિતા એટલે
મૂંગી ચીસો,
જે ગૂંજે છે શબ્દો વચ્ચેના અવકાશમાં !

કવિતા એટલે
હાંફતાં શ્વાસો,
જે ધબકતાં રહે છે સર્જકની કલમમાં !

Read More

#kavyotsav

પાછી મળે..!
- જૈમીન ધામેચા

વહી ચુકેલાં સમયના ઝરણાંની બુંદો પાછી મળે..!
સ્પષ્ટ નહિ અતીતની યાદો ભલે ને, આછી મળે..!

રખડે છે આંખો જે ઊંઘની તલાશમાં આખી રાત,
અગાસીના તારાઓની સોડમાં નીની પાછી મળે...!

બસ, થાક્યાં હવે ઉબડ ખાબડ અનુભવના રસ્તે,
કોઈ ટાઢે છાંયડે બેઠેલી એ નવરાશ પાછી મળે...!

ગૂંચવાયો છું ખુદ જ સંબંધોમાં કરોળિયાની જેમ,
ખોવાયેલા મિત્રોની અદકેરી સોગાદ પાછી મળે...!

તરસી રહ્યું છે 'સ્વપ્ન' એક અજાણી બુંદ માટે,
ક્યાંક સાવ ઊંડે ધરબાયેલી મીઠાશ પાછી મળે..!

Read More

#kavyotsav

ધબકાર..!
- જૈમીન ધામેચા

દિલના કોઈ ખૂણે છૂપો સૂનકાર છે,
મૌનમાં ગૂંજતો જાણીતો રણકાર છે !

સાવ અડોઅડ બેઠાં છે એકબીજાને,
તોય વચ્ચે જાણે અમથો અહંકાર છે !

સુગંધી પરોઢમાં છે તડકાની નરમાશ,
ગઈરાતનો સ્હેજ આછો અંધકાર છે !

સમયની થાળીમાં વધી છે યાદો જ,
પેટ કેમ ભરવું એ જ હવે પડકાર છે !

છેલ્લી વખત આવે છે આ નામ હોઠે,
હવે બચેલો આ છેલ્લો ધબકાર છે !

Read More