સત્યાવીસ જાન્યુઆરી ૨૦૧૮ નો દિવસ હતો આજે સવારથી સુમનની યાદ આવી રહી હતી, કારણ કે સુમન સાથે મેં એ સમય વિતાવ્યો હતો. સુમનને યાદ કરીને ચહેરા ઉપર એક સ્મિત ફરી વળતું, પણ હવે સુમન સાથે વાત થયા પછી ચહેરા ઉપર એક ગમગીની છવાઈ જાય છે. એક અપરાધભાવ મગજમાં આવી જાય છે. તેર વર્ષ પછી બે દિવસ પહેલા સુમન સાથે વાત થઇ હતી. સુમને મારી સાથે સરખી રીતે વાત પણ ન કરી. કોઈ અજાણ્યા સાથે વાત કરી હોય એ રીતે વાત કરી. સુમન સાથે જે વાત થઇ એ વાતે આજે મને અકળામણમાં મૂકી દીધો. મારી પત્ની નસીમ મારી બાજુમાં સુતી હતી. હું સુમનના વિચાર કરતા કરતા સુઈ ગયો. રાત્રે એક વાગ્યે હું ઝબકીને ઉઠી ગયો, એટલા જોરદાર ઝટકા સાથે ઝબકી ગયો કે મારી પત્ની નસીમ ચોંકીને ઉઠી ગઈ.