బయట అలజడికి మెలుకువ వచ్చేసింది ప్రశాంతరావుకి. తన భార్య లక్ష్మిని చూశాడు. ఆమె నిద్రిస్తుంది. గోడ గడియారం వైపు చూశాడు. మూడూ పది. వీథి వైపు లైట్ స్విచ్ ఆన్ చేసి బయట గుమ్మం తలుపు తీసుకొని వీథి వైపుకు కదిలాడు ప్రశాంతరావు. తన కాలనీలో మూడు నాలుగు ఇళ్ల ముందు లైట్లు వెలిగి ఉన్నాయి. పక్కింటి ముందు నలుగురయ్యిదుగురు మూకలా కనిపించారు. "ఏమిటీ వేళప్పుడు" అడిగాడు ప్రశాంతరావు అటు వెళ్లి. మూక విడింది. వారంతా తమ ఇంటికి దగ్గరిళ్ల వారే. "మన శ్రీధర్ ఇంట్లోకి దొంగ దూరబోయాడు. పట్టు బడ్డాడు. వీడే వాడు" అని చెప్పాడు ఒకడు. ఆ దొంగ కింద పడి ఉన్నాడు. తన కుడి కాలుని తన రెండు అర చేతులతో పట్టకొని తల వాల్చుకొని మూలుగుతూ ఉన్నాడు. ప్రశాంతరావు మరింత దగ్గరగా వెళ్లాడు.