એક રૂપાળી યુવતીના હીરોઇન બનવાના સંઘર્ષ સાથે ફિલ્મી દુનિયાના અંધારા-અજવાળાની વાતો કરતી અને આ ક્ષેત્રના રાજકારણ, કાવા-દાવા, હવસ, પ્રેમ અને ઝગમગાટને આવરી લેતી 'લાઇમ લાઇટ' કોઇ રોમાંચક, દિલધડક, રહસ્યમય ફિલ્મની જેમ તમને જકડી રાખશે. માતૃભારતી એપ ઉપર ઇ પુસ્તકમાં લોકપ્રિય થયા પછી પેપરબેક પુસ્તકના માધ્યમમાં પણ "લાઇમ લાઇટ" બ્લોકબસ્ટર સાબિત થશે એનો વિશ્વાસ છે. આપણે મનોરંજન મેળવવા ફિલ્મો જોઇએ છીએ. એટલે જ 'લાઇમ લાઇટ' નવલકથામાંથી વાચકોને પૂરતું મનોરંજન મળી રહે એવો પ્રયાસ કર્યો છે. * આજે તે એક ફિલ્મની હીરોઇન બનવાનું સ્વપ્ન સાકાર કરી રહી હતી તેના મૂળમાં તેની આશાનું બીજ હતું. તે પિતાને હોસ્પિટલમાં સારવાર અપાવી રહી હતી ત્યારે વોર્ડબોય રાઘવે આર્થિક સંકડામણમાંથી બહાર આવવા શરીર વેચવાનો રસ્તો બતાવ્યો હતો. તે બસો-પાંચસો રૂપિયા માટે કોઇની નજર ના હટે એવા સુંદર શરીર સાથે ખેલવા દઇને ગુમનામીના અંધકારમાં જીવવા માગતી ન હતી. મોટી લાઇટોના અજવાળામાં મોટા પડદા પર પોતાનું કામણગારું શરીર બતાવી કરોડો લોકોના દિલમાં સ્થાન બનાવવા માગતી હતી. ('લાઇમ લાઇટ' માંથી) * સાકીર ખાન એક ફ્લેટના બદલામાં તેના શરીરની ગરમાહટને ખરીદી લેવા માગતો હતો. એ કોઇનો ફ્લેટ ખરીદીને આપવા માગતો હતો અને એનાથી રસીલીને ખરીદીને પોતાની હવસ પૂરી કરવા માગતો હતો. એ તેની અને રસીલીની વચ્ચે બીજા કોઇને આવવા દેવા માગતો ન હતો. આ શરત કઠીન હતી. રસીલીને ખબર હતી કે ફિલ્મી દુનિયામાં ફિલ્મ દર ફિલ્મ પ્રેમી અને શરીરના માલિક બદલાતા રહેવાના હતા. જો તે પોતાના શરીરના બધા હક્ક સાકીરને આપી દે તો બીજી ફિલ્મો ઓછી મળવાની હતી. ઘણાંને નારાજ કરવા પડશે. ('લાઇમ લાઇટ' માંથી) *