धुक्यात हरवलेलं माथेरान... - Novels

by Dr.Swati More in Marathi Travel stories

विजांच्या कडकडाटने अचानक जाग आली.. मोबाईल बघितला, तर पहाटेचे साडेतीन वाजले होते.. थोड्याच वेळात आम्हाला माथेरानसाठी निघायचं होतं.. तसा मी सव्वा चारचा गजर लावला होता पण "दामिनी मॅडमनी" थोडं अगोदरचं मला उठवलं.. बेडरूमचा पडदा बाजूला करून बघितलं तर मॅडम एकट्याच नव्हत्या त्यांच्या सोबत वरुण देवही आपलं अस्तित्व दाखवत होता..... मनात आलं आज काही खरं नाही आपल्या ट्रिपचं ... तशीच थोडा वेळ पडून राहिले पण झोपच येईना मग उठून तयारीला लागले.. अनिलला उठवून अंघोळीला जायला सांगितलं.. फक्कडसा चहा बनवावा या विचाराने मी दुधासाठी फ्रिज उघडला.. अरेच्चा ! दुध कुठं गेलं. काल तर अगदी आठवणीने चहा पुरतं काढून ठेवलं होत.. आधी वाटलं माझी झोप उडाली नाही.. म्हणून डोळे चोळले पण काही उपयोग झाला नाही.. फ्रिज मधे खरचं दूध नव्हतं.. माझं लक्ष्य सिंककडे गेलं तर त्यात दुधाचा ग्लास मला वाकुल्या दाखवत होता .. मला अंदाज आला काय झालं असणार, आम्ही दोन दिवस घरी नसणार आणि आहे ते दूध खराब होऊ नये म्हणून आमच्या घरच्या मांजरीने कधी नव्हे ते रात्रीच दूध पिऊन टाकलं होतं..( चाणाक्ष वाचकांनी मांजर कोण ते ओळखलं असेलचं ??)