ಬೆಂಗಳೂರಿನ ವಿಜಯನಗರದ ಆ ಹಳೆಯ ಬಾಡಿಗೆ ಮನೆಯಲ್ಲಿ ಗುಂಡಪ್ಪ ಮತ್ತು ಶೀನಣ್ಣ ಎಂಬ ಇಬ್ಬರು ವಿಚಿತ್ರ ಗೆಳೆಯರಿದ್ದರು. ಗುಂಡಪ್ಪನಿಗೆ ಕಿವಿ ಮಂದವಾಗಿದ್ದರೆ, ಶೀನಣ್ಣನಿಗೆ ಪ್ರತಿಯೊಂದು ಸಾಮಾನ್ಯ ವಿಷಯವನ್ನೂ ಒಂದು ದೊಡ್ಡ ಅಂತರಾಷ್ಟ್ರೀಯ ಪಿತೂರಿಯಂತೆ ನೋಡುವ ಕಾಯಿಲೆ ಇತ್ತು. ಅಂದು ಭಾನುವಾರದ ಮಧ್ಯಾಹ್ನ, ಕರೆಂಟ್ ಇಲ್ಲದೆ ಇಡೀ ಏರಿಯಾ ಮೌನವಾಗಿತ್ತು. ಗುಂಡಪ್ಪ ತನ್ನ ಬೆವರಿದ ಹಳೆಯ ಬಾಕ್ಸಿಂಗ್ ಗ್ಲೌಸ್ ತೊಟ್ಟು, ಕನ್ನಡಿಯ ಮುಂದೆ ನಿಂತು ಯಾವುದೋ ಅದೃಶ್ಯ ಶತ್ರುವಿನ ಮೇಲೆ ಪಂಚ್ಗಳನ್ನು ಹಾಕುತ್ತಾ ಕಸರತ್ತು ಮಾಡುತ್ತಿದ್ದ. ಅಷ್ಟರಲ್ಲಿ ಶೀನಣ್ಣ ಕಿಟಕಿಯ ಹತ್ತಿರ ಬೆಕ್ಕಿನಂತೆ ಹೊಂಚು ಹಾಕುತ್ತಾ ಪಕ್ಕದ ಮನೆಯ ಸಾವಿತ್ರಮ್ಮ ಮತ್ತು ಪಾರ್ವತಮ್ಮ ಮಾತನಾಡಿಕೊಳ್ಳುತ್ತಿರುವುದನ್ನು ಕೇಳಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದ. ಸಾವಿತ್ರಮ್ಮ ತುಂಬಾ ಗಂಭೀರವಾಗಿ ಪಿಸುಗುಟ್ಟುತ್ತಾ, ನೋಡಿ ಪಾರ್ವತಮ್ಮ, ಈ ಗುಂಡಣ್ಣನ ಕಾಟ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ, ರಾತ್ರಿಯೆಲ್ಲಾ ಮಲಗಲು ಬಿಡುತ್ತಿಲ್ಲ, ಅಡುಗೆ ಮನೆಯಲ್ಲೇ ಅವನ ಅಸಹ್ಯ ಜಾಸ್ತಿಯಾಗಿದೆ, ಹಾಗಾಗಿ ಇವತ್ತು ರಾತ್ರಿ ಅವನನ್ನು ಪೂರ್ತಿಯಾಗಿ ಮುಗಿಸಿಬಿಡಬೇಕು, ಸರಿಯಾದ ಚಾಕು ತಂದು ಒಂದೇ ಏಟಿಗೆ ಅವನ ಕೆಲಸ ಮುಗಿಸಿದರೆ ಶಾಂತಿ ಸಿಗುತ್ತದೆ, ಆಮೇಲೆ ಅವನ ಈ ಅವಶೇಷಗಳನ್ನು ಒಂದು ದೊಡ್ಡ ಪ್ಲಾಸ್ಟಿಕ್ ಕವರ್ನಲ್ಲಿ ತುಂಬಿಸಿ ಯಾರಿಗೂ ತಿಳಿಯದಂತೆ ಕಸದ ಗಾಡಿಗೆ ಎಸೆದುಬಿಡೋಣ, ಅಲ್ಲಿಗೆ ಅವನ ಕಥೆ ಮುಗಿಯಿತು ಎನ್ನುತ್ತಿದ್ದರು.
ಇದನ್ನು ಕೇಳಿದ ತಕ್ಷಣ ಶೀನಣ್ಣನ ಮಿದುಳಿನ ಒಳಗಿನ ಸೈರನ್ ಜೋರಾಗಿ ಮೊಳಗಿತು. ಅವನು ಹೈಜಾಕ್ ಆದ ವಿಮಾನದ ಪೈಲಟ್ನಂತೆ ಕಿರುಚುತ್ತಾ ಓಡಿ ಬಂದು ಗುಂಡಪ್ಪನಿಗೆ, ಲೇ ಗುಂಡಪ್ಪಾ, ಬಾಕ್ಸಿಂಗ್ ನಿಲ್ಲಿಸು ನಿನ್ನ ವ್ಯಾಲಿಡಿಟಿ ಇವತ್ತು ರಾತ್ರಿಗೆ ಎಕ್ಸ್ಪೈರ್ ಆಗುತ್ತಿದೆ, ಪಕ್ಕದ ಮನೆಯ ಸಾವಿತ್ರಮ್ಮ ನಿನ್ನನ್ನು ಚಾಕು ಹಾಕಿ ಪ್ಲಾಸ್ಟಿಕ್ ಕವರ್ನಲ್ಲಿ ಪ್ಯಾಕ್ ಮಾಡಿ ಕಸದ ಗಾಡಿಗೆ ಹಾಕಲು ಸ್ಕೆಚ್ ಹಾಕಿದ್ದಾರೆ, ಅವರು ನಿನ್ನನ್ನು ಅಸಲಿಯಾಗಿ ಡಿಲೀಟ್ ಮಾಡಲು ರೆಡಿಯಾಗಿದ್ದಾರೆ ಎಂದು ಬೆವರುತ್ತಾ ಕೂಗಿದ. ಆದರೆ ಕಿವಿ ಮಂದವಾಗಿದ್ದ ಗುಂಡಪ್ಪ ಕೇಳಿಸಿಕೊಂಡಿದ್ದೇ ಬೇರೆ. ಅವನು ಮುಖದಲ್ಲಿ ಒಂದು ದಿವ್ಯ ನಗು ಬೀರುತ್ತಾ, ಹೌದಾ ಶೀನಣ್ಣ? ಅಯ್ಯೋ ಸಾವಿತ್ರಮ್ಮ ಅಂದರೆ ಸಾಕ್ಷಾತ್ ಅನ್ನಪೂರ್ಣೇಶ್ವರಿ ಕಣೋ, ಇವತ್ತು ರಾತ್ರಿ ನನಗೆ ಚಾಕೊಲೇಟ್' ಹಾಕಿ ದೊಡ್ಡ ಪಾರ್ಟಿ ಕೊಟ್ಟು, ಪ್ಲಾಸ್ಟಿಕ್ ಕವರ್ನಲ್ಲಿ ರಿಟರ್ನ್ ಗಿಫ್ಟ್ ಕೊಡುತ್ತಾರಂತೆ ಅಲ್ವಾ? ನೀನು ಯಾಕೋ ಸುಮ್ಮನೆ ಅವರ ಮೇಲೆ ಸಂಶಯ ಪಡ್ತೀಯಾ, ಎಂದು ನಕ್ಕ. ಶೀನಣ್ಣನಿಗೆ ತಲೆ ಕೆಟ್ಟು ಹೋಯಿತು, ಲೇಯ್ ಪೆದ್ದ, ಪಾರ್ಟಿ ಅಲ್ಲವೋ ನಿನ್ನ ಶವಯಾತ್ರೆ ಅವರು ಚಾಕು ಬಗ್ಗೆ ಮಾತನಾಡುತ್ತಿದ್ದಾರೆ, ನಾವು ಈಗಲೇ ಯಾವುದಾದರೂ ಆಕ್ಷನ್ ತಗೊಳ್ಳಬೇಕು ಇಲ್ಲದಿದ್ದರೆ ಅವರು ನಮ್ಮನ್ನು ನಮ್ಮದೇ ಮನೆಯಲ್ಲಿ ಹೋಮ್ ಡೆಲಿವರಿ ಮಾಡಿಬಿಡುತ್ತಾರೆ," ಎಂದು ಬೆದರಿಸಿದಾಗ ಗುಂಡಪ್ಪನಿಗೂ ಸ್ವಲ್ಪ ಅನುಮಾನ ಶುರುವಾಯಿತು.
ಅಷ್ಟರಲ್ಲೇ ಪಕ್ಕದ ಮನೆಯ ಅಡುಗೆ ಮನೆಯಿಂದ ಯಾವುದೋ ಮಾಂಸವನ್ನು ಕತ್ತರಿಸುವ ಖಚ್ ಖಚ್ ಸದ್ದು ಕೇಳಲು ಶುರುವಾಯಿತು. ಶೀನಣ್ಣ ಆ ಸದ್ದನ್ನು ಕೇಳಿ, ನೋಡು ಗುಂಡಪ್ಪ, ಅವರು ನಿನ್ನ ಶರೀರವನ್ನು ಯಾವ ರೀತಿ ತುಂಡು ಮಾಡಬೇಕು ಎಂದು ಈಗಲೇ ಪ್ರಾಕ್ಟೀಸ್ ಮಾಡುತ್ತಿದ್ದಾರೆ, ಎಂದು ಹೇಳಿ ಪೋಲೀಸ್ ಕಂಟ್ರೋಲ್ ರೂಮ್ಗೆ ಫೋನ್ ಮಾಡಿ, ಸರ್, ವಿಜಯನಗರದಲ್ಲಿ ಒಬ್ಬ ಅಂತರಾಷ್ಟ್ರೀಯ ಸೀರಿಯಲ್ ಕಿಲ್ಲರ್ ಒಬ್ಬ ಬಾಕ್ಸರ್ನನ್ನು ಕೊಲೆ ಮಾಡಿ ಪ್ಲಾಸ್ಟಿಕ್ ಕವರ್ನಲ್ಲಿ ತುಂಬಿಸಲು ರೆಡಿಯಾಗಿದ್ದಾಳೆ, ಈಗಲೇ ಎನ್ಕೌಂಟರ್ ಮಾಡಲು ಬನ್ನಿ ಎಂದು ಕಿರುಚಿದ. ಅತ್ತ ಕಡೆ ಗುಂಡಪ್ಪ ತನ್ನ ಬಾಕ್ಸಿಂಗ್ ಗೌರವ ಮತ್ತು ಜೀವವನ್ನು ಉಳಿಸಿಕೊಳ್ಳಲು ನಿರ್ಧರಿಸಿ, ನಾನು ಬಾಕ್ಸರ್ ಅಪ್ಪಾ, ಕಟುಕನಲ್ಲ, ಅವರು ಚಾಕು ತಂದರೆ ನಾನು ನನ್ನ 'ಅಪ್ಪರ್ ಕಟ್' ತೋರಿಸುತ್ತೇನೆ ಎಂದು ಹೇಳಿ ಗೋಡೆ ಹಾರಿ ಸಾವಿತ್ರಮ್ಮನ ಅಡುಗೆ ಮನೆಗೆ ನುಗ್ಗಿಯೇ ಬಿಟ್ಟ. ಅಲ್ಲಿ ಅಡುಗೆ ಮನೆಯ ಬೆಳಕು ಮಂದವಾಗಿತ್ತು, ಟೇಬಲ್ ಮೇಲೆ ಒಂದು ದೊಡ್ಡ ಗುಂಡಗಿರುವ ಶರೀರದಂತಹ ವಸ್ತು ಇತ್ತು ಮತ್ತು ಸಾವಿತ್ರಮ್ಮ ಅಬ್ಬರದಿಂದ ಕತ್ತಿ ಬೀಸುತ್ತಿದ್ದರು. ಗುಂಡಪ್ಪ ಮೃತ್ಯುಂಜಯನಂತೆ ಆವೇಶದಿಂದ ಒಳಗೆ ನುಗ್ಗಿ, ನಿಲ್ಲಿಸಿ ಈ ಕ್ರೌರ್ಯವನ್ನು ಎಂದು ಚೀರುತ್ತಾ ತನ್ನ ಬಾಕ್ಸಿಂಗ್ ಗ್ಲೌಸ್ನಿಂದ ಅಲ್ಲಿಯೇ ಉರಿಯುತ್ತಿದ್ದ ಸ್ಟೌವ್ ಮೇಲಿದ್ದ ಎಂಟು ಲೀಟರ್ನ ದೊಡ್ಡ ಪ್ರೆಶರ್ ಕುಕ್ಕರ್ಗೆ ಒಂದು ಸುನಾಮಿ ಪಂಚ್ ಕೊಟ್ಟ.
ಆ ಕುಕ್ಕರ್ ರಾಕೆಟ್ನಂತೆ ಹಾರಿ ಹೋಗಿ ಸಾವಿತ್ರಮ್ಮನ ತಲೆಗೆ ತಗುಲಿ ಅವರು ಕೆಳಗೆ ಬಿದ್ದರು. ಅಷ್ಟರಲ್ಲಿ ಶೀನಣ್ಣನ ಕಂಪ್ಲೇಂಟ್ ಕೇಳಿ ಪೋಲೀಸರು ಜೀಪ್ನಲ್ಲಿ ಸೈರನ್ ಹಾಕಿಕೊಂಡು ಅಕ್ಷರಶಃ ಯುದ್ಧಭೂಮಿಗೆ ಬಂದವರಂತೆ ನುಗ್ಗಿದರು. ಇಡೀ ಏರಿಯಾದ ಜನರು ಏನು ನಡೆಯುತ್ತಿದೆ ಎಂದು ತಿಳಿಯದೆ ಜಮಾಯಿಸಿದರು. ಇನ್ಸ್ಪೆಕ್ಟರ್ ಗನ್ ಹಿಡಿದು ಒಳಗೆ ಬಂದು ನೋಡಿದಾಗ ಸಾವಿತ್ರಮ್ಮ ಎಚ್ಚರಗೊಂಡು ತಲೆ ಸವರುತ್ತಾ ಕಣ್ಣೀರು ಹಾಕುತ್ತಾ, ಅಯ್ಯೋ ಸಾಹೇಬ್ರೇ, ಇವತ್ತು ನಮ್ಮ ಮಗನ ಹದಿನೆಂಟನೇ ಹುಟ್ಟುಹಬ್ಬ ಅಂತ ಒಂದು ದೊಡ್ಡ 'ಗುಂಡು' ಕುಂಬಳಕಾಯಿ ತಂದಿದ್ದೆ, ಅದಕ್ಕೆ ನಾವು ಪ್ರೀತಿಯಿಂದ ಗುಂಡಣ್ಣ ಅಂತ ಹೆಸರಿಟ್ಟಿದ್ದೆವು, ಅದು ಅಡುಗೆ ಮನೆಯಲ್ಲಿ ಜಾಗವಿಲ್ಲದೆ ತೊಂದರೆ ಕೊಡುತ್ತಿತ್ತು ಅಂತ ಕತ್ತರಿಸಿ ಹಲ್ವಾ ಮಾಡೋಣ ಅಂದುಕೊಂಡರೆ, ಈ ಇಬ್ಬರು ಅರೆಹುಚ್ಚರು ಬಂದು ನನ್ನ ಕೈ ಕಾಲು ಮುರಿದು ಇಡೀ ಅಡುಗೆ ಮನೆಯನ್ನೇ ಸ್ಮಶಾನ ಮಾಡಿಬಿಟ್ಟರು ಎಂದು ಗೋಳಾಡಿದರು. ಅಲ್ಲಿಗೆ ಗುಂಡಪ್ಪ ಮತ್ತು ಶೀನಣ್ಣನ ಮುಖ ನೋಡಬೇಕಿತ್ತು, ಅಕ್ಷರಶಃ ಪೆಂಟಿನಲ್ಲಿ ಗಾರೆ ಮೆತ್ತಿದಂತೆ ಆಗಿತ್ತು. ಪಾರ್ವತಮ್ಮ ಬಂದು, ಲೇ ಶೀನಣ್ಣ, ಚಾಕು ಹಾಕೋದು ಅಂದರೆ ಕುಂಬಳಕಾಯಿಗೆ ಚಾಕು ಹಾಕಿ ಹೋಳು ಮಾಡೋದು ಅಂತ ಅರ್ಥ, ಪ್ಲಾಸ್ಟಿಕ್ ಕವರ್ನಲ್ಲಿ ಹಾಕೋದು ಅಂದರೆ ಹಲ್ವಾನ ಸಣ್ಣ ಸಣ್ಣ ಪ್ಯಾಕೆಟ್ ಮಾಡಿ ಜನರಿಗೆ ಹಂಚೋದು ಅಂತ ಕಣೋ, ಎಂದು ಹೇಳಿದಾಗ ಇಡೀ ಏರಿಯಾ ಜನ ಹೊಟ್ಟೆ ಹಿಡಿದು ನೆಲದ ಮೇಲೆ ಬಿದ್ದು ಬಿದ್ದು ನಗಲು ಶುರು ಮಾಡಿದರು.
ಪೋಲೀಸರು ಗುಂಡಪ್ಪನಿಗೆ ಒಂದು ಲಾಠಿ ಏಟು ಹಾಕಿ, ಲೇಯ್ ಮೃತ್ಯುಂಜಯ, ಕುಂಬಳಕಾಯಿನ ಮನುಷ್ಯ ಅಂತ ತಿಳ್ಕೊಂಡು ಅಟ್ಯಾಕ್ ಮಾಡ್ತೀಯಾ? ನಡಿ ಸ್ಟೇಷನ್ಗೆ ಅಂದಾಗ ಗುಂಡಪ್ಪ ಮತ್ತೆ ತನ್ನ ಮಂದ ಕಿವಿಯನ್ನು ಕೆಲಸಕ್ಕೆ ಹಚ್ಚಿ, ಏನು ಸರ್? ಸ್ಟೇಷನ್ನಲ್ಲಿ ಕುಂಬಳಕಾಯಿ ಹಲ್ವಾ ರೆಡಿಯಾಗಿದೆಯಾ? ನಡೀರಿ ಸರ್ ಹೋಗೋಣ, ನನಗೂ ತುಂಬಾ ಹಸಿವಾಗಿದೆ, ಅಲ್ಲಿ ಬಿಸಿ ಬಿಸಿಯಾಗಿ ಹಲ್ವಾ ತಿನ್ನೋಣ ಎಂದು ಗಂಭೀರವಾಗಿ ಹೇಳಿದಾಗ ಇನ್ಸ್ಪೆಕ್ಟರ್ ತನ್ನ ತಲೆಗೆ ತಾನೇ ಗನ್ ಇಟ್ಟುಕೊಳ್ಳುವಷ್ಟು ಬೇಸರ ಮಾಡಿಕೊಂಡರು. ಮರುದಿನ ಬೆಳಿಗ್ಗೆ ಗುಂಡಪ್ಪ ಮತ್ತು ಶೀನಣ್ಣ ಮುಖ ಮುಚ್ಚಿಕೊಂಡು ಮನೆಯಲ್ಲಿ ಕುಳಿತಿದ್ದಾಗ, ಪೋಲೀಸ್ ಸ್ಟೇಷನ್ನ ಕಾನ್ಸ್ಟೇಬಲ್ ಒಬ್ಬ ಪಾರ್ಸೆಲ್ ತಂದುಕೊಟ್ಟ, ಅದರ ಮೇಲೆ ಸಂದೀಪ್ ಕಡೆಯಿಂದ ಸ್ಪೆಷಲ್ ಸಸ್ಪೆನ್ಸ್ ಗಿಫ್ಟ್' ಎಂದು ದೊಡ್ಡ ಅಕ್ಷರದಲ್ಲಿ ಬರೆಯಲಾಗಿತ್ತು. ಶೀನಣ್ಣ ಅದು ನಿನ್ನೆ ಮಾಡಿದ ಅವಾಂತರಕ್ಕೆ ಯಾರೋ ಕೊಟ್ಟ ಟೈಮ್ ಬಾಂಬ್ ಇರಬಹುದು ಎಂದು ಹೆದರಿ ಮನೆಯ ಮೇಲ್ಛಾವಣಿಗೆ ಓಡಿದರೂ, ಗುಂಡಪ್ಪ ಧೈರ್ಯ ಮಾಡಿ ಅದನ್ನು ಬಿಚ್ಚಿ ನೋಡಿದಾಗ ಅದರ ಒಳಗೆ ಒಂದು ದೊಡ್ಡ ಹಣ್ಣಾದ ಕುಂಬಳಕಾಯಿ ಇತ್ತು ಮತ್ತು ಅದರ ಮೇಲೆ ಒಂದು ಚಿನ್ನದ ಬಣ್ಣದ ಚೀಟಿ ಇತ್ತು ಸಂದೀಪ್ - ಕಥೆ ನಂಬರ್ 212 ಅಪಾರ್ಥದ ಅವಾಂತರ ಇಲ್ಲಿಗೆ ಸಂಪೂರ್ಣವಾಗಿ ಮುಕ್ತಾಯವಾಯಿತು. ಈ ಕುಂಬಳಕಾಯಿ ಹಲ್ವಾ ತಿಂದು ನಿಮ್ಮ ಬಾಕ್ಸಿಂಗ್ ಶಕ್ತಿಯನ್ನು ಅಡುಗೆ ಮನೆಯ ಪಾತ್ರೆಗಳ ಮೇಲಾಗಲಿ ಅಥವಾ ಕುಂಬಳಕಾಯಿ ಮೇಲಾಗಲಿ ಬಳಸುವುದನ್ನು ದಯವಿಟ್ಟು ನಿಲ್ಲಿಸಿ. ಏಕೆಂದರೆ ಮುಂದಿನ ಕಥೆ ನಂಬರ್ 213 ಅಪ್ಪಟ ರಕ್ತಸಿಕ್ತ ಸಸ್ಪೆನ್ಸ್ ಮತ್ತು ಗಂಭೀರವಾದ ಥ್ರಿಲ್ಲರ್ ಆಗಿರಲಿದೆ ಗುಂಡಪ್ಪ ಆ ಕುಂಬಳಕಾಯಿಯನ್ನು ನೋಡಿ ನಗುತ್ತಾ, ನೋಡು ಶೀನಣ್ಣ, ಸಂದೀಪ್ ಎಷ್ಟು ಒಳ್ಳೆಯವರು, ನಮಗೆ ಬಾಂಬ್ ಬದಲಾಗಿ ಬಂಬಾಟ್ ಆಗಿ ಹೊಟ್ಟೆ ತುಂಬಿಸಿಕೊಳ್ಳಲು ಕುಂಬಳಕಾಯಿ ಕಳಿಸಿದ್ದಾರೆ, ಅವರಿಗೆ ಒಂದು ದೊಡ್ಡ ಸಲ್ಯೂಟ್ ಹೊಡೆದುಬಿಡು ಎಂದು ಹೇಳಿ ಮತ್ತೆ ತನ್ನ ಬಾಕ್ಸಿಂಗ್ ಪ್ರಾಕ್ಟೀಸ್ ಶುರು ಮಾಡಿದರೆ, ಶೀನಣ್ಣ ಮಾತ್ರ ಅಸಹಾಯಕನಾಗಿ ಆ ಕುಂಬಳಕಾಯಿಯನ್ನೇ ದಿಟ್ಟಿಸಿ ನೋಡುತ್ತಾ ಕುಳಿತಿದ್ದ.
