કવિતા રૂપે શબ્દો ની સરગમ રજુ કરૂં છું.એ મારા અંતરની અભિવ્યક્તિ છે . મેં મારા દિલમાં ઉભરતા ભાવને શબ્દોમાં અભિવ્યક્ત કરવાની કોશિશ કરી છે.
****""""""******
દિવાની
તારા લખાયેલ શબ્દો ફેલાવે સુગંધ મસ્તાની;
બની હું તારા સુગંધિત શબ્દો ની દિવાની !
તારી મુરલી ના સૂર છેડે તાન તોફાની ;
બની હું તારા સુરીલા સંગીત ની દિવાની !
તારા રચિત ચિત્રો દર્શાવે એક કહાની;
બની હું તારી અનન્ય અનૂભૂતિની દિવાની !
તારો સાથ મળ્યો ને ખીલી હું જાણે ચાંદની;
બની હું તારા પ્રેમાળ વ્યક્તિત્વની દિવાની !
**""""*********
હોઠ
આ હૈયાની વાત હોઠોં પર આવશે કદી ?
લાગણીઓ શબ્દ બની નિખરશે કદી ?
દિલમાં ઉઠેલ ભરતી ને ઓટ આવશે કદી ?
મધદરિયે ઝઝૂમતી નૌકા પાર થશે કદી ?
કોરો કાગળ અક્ષરો થી શોભશે કદી ?
બંધ પડેલ કલમને વાચા મળશે કદી ?
હૈયાથી હોંઠો ની સફર ને મુકામ મળશે કદી?
અવિરત લાગણીઓ નાં પ્રવાહ ને વિરામ મળશે કદી ?
*******"""""**********
મિલન
આ લાગણીઓનું પૂર મુજ ઉર મહીં ઉભરે;
વહી જાઉં છું એમાં ,એ ક્યાં લઇ ને જશે?
તારા મોહની માયાજાળ ફેલાય મુજ અંતરે ;
જકડાઈ જાઉં છું એમાં, એ ક્યાં લઈ ને જશે?
તારા ગીતનાં શબ્દો છેડે મધુર સંગીત મારા તંબુરે ;
રેલાઈ જાઉં છું એમાં, એ ક્યાં લઇ ને જશે ?
તારા મિલનની ઝંખના હરદમ ઉઠતી મુજ ઉરે ;
શરમાઈ જાઉં છું વિચારી , એ ક્યાં લઇ ને જશે ?
*************""""""*******
મર્મ
શું હું ખાળી શકું તારા મૌન મહીં છુપાયેલ મર્મ ?
ભલે હું જાઉં નિષ્ફળ,મને કોશિશ તો કરવા દે !
શું હું જાણી શકું તારી એકલતા મહીં છુપાયેલ મર્મ ?
ભલે મને ન સમજાય, મને તારી સાથે વાત તો કરવા દે !
શું હું જાણી શકું તારી અંદર દબાયેલી લાગણીઓનો મર્મ ?
ભલે મારી લાગણીઓ દુભાય, તારી લાગણી ઓ સમજવા તો દે ?
શું હું જાણી શકું તારા ચહેરા પર ની ઉદાસી નો મર્મ?
ભલે મને તકલીફ થાય, પણ તારા ચહેરા પર એક સ્મિત
તો લાવવા દે ?
******""""""********
ભાવ
તારી આંખો દર્શાવે દિલમાં છુપાં ભાવ;
ભલે ને તું એને તારા ચહેરા ઉપર છુપાવ !
તારા અંતરની ઉર્મિઓ શાને ભિતર દબાવ ?
તારા લખાયેલ શબ્દો થકી એને તું બતાવ !
તારી કોમળ લાગણીઓ ને શું કામ કરે ગરકાવ ?
એને મધુર સંગીત સંગ દશે દિશામાં ફેલાવ !
તારા મનની સુષુપ્ત ઝંખના ને જગાડ ;
એને તારા નૃત્ય થકી જગતને જણાવ !
મનમાં ઉઠતા ભાવને મન મહીં ન સિમિત રાખ;
એને અનન્ય અભિવ્યક્તિ સંગ જગતમાં ફેલાવ !
***********
શબ્દ
તું શબ્દ બની ને આવ, હું લખું એક કવિતા ;
તારા શબ્દો મારી કવિતા માં ભળી વહેશે જાણે સરિતા !
તું સૂર બની ને આવ , હું ગાઉં એક ગીત ;
તારા સૂર મારા ગીત માં ભળી રચશે મધુર સંગીત !
તું રંગ બનીને આવ, હું બનાવું એક રંગોળી ;
તારા રંગ મારી રંગોળી માં ભરી ઉજવશે દિવાળી !
તું પ્રેરણા બની ને આવ, હું કંડારુ એક મૂર્તિ,
તારી પ્રેરણા મારી મૂર્તિ માં નવા પ્રાણ પુરતી !
*********""""""********
મારી અભિલાષા
તારા હ્રદયમાં રહું
હું ધબકાર બનીને !
તારા મનમાં રહું
હું વિચાર બનીને !
તારી આંખો માં રહું
હું પલકાર બનીને !
તારા રોમેરોમમાં રહું
હું વિસ્તાર બનીને !
તારા જીવનમાં રહું
હું શણગાર બનીને !
*******************
સંગમ
મળે જો એક મેક ના વિચારો,
તો રચાય મધમીઠી મિત્રતા નો સંગમ !
ખીલે જો ઉર મહીં પુષ્પ પ્રેમ નું,
તો રચાય લાલિત્યસભર લાગણીઓનો સંગમ !
વહે જો સમીર સ્નેહભરી સરવાણીનો ,
તો રચાય સૂરીલા સંબંધો નો સંગમ !
છલકે જો અમીરસ આંખોમાંથી,
તો રચાય અમૃત સમાન જીવન નો સંગમ !
ડૉ.સેજલ દેસાઈ
સુરત ?
