પ્રકરણ ૧૦: અમદાવાદ ઇન્ટરનેશનલ એરપોર્ટ—કાર્ગો ઝોન ઘેરાબંધી
થાઇલેન્ડના પત્તાયા કોસ્ટ પર સોમચાઇ લોપબુરીને દબોચીને તેની સુપર-યોર્ટ 'ધ ઓસન કિંગ' પર કબ્જો કર્યા પછી ઇન્સ્પેક્ટર વિપુલ પાસે વિજય ઉત્સવ મનાવવાનો સમય નહોતો. આઈ.બી. ચીફ અય્યર સરના એ ફોને આખા ઓપરેશનની દિશા બદલી નાખી હતી. જે ગદ્દાર આખા દેશના યુવાધનને મોતના મુખમાં ધકેલી રહ્યો હતો, તે કોઈ બહારનો માફિયા નહીં પણ આઈ.બી.ની અંદર જ બેઠેલો એક સીનિયર ઓફિસર હતો.
વિપુલે સોમચાઇને આંતરરાષ્ટ્રીય કસ્ટડીમાં સોંપીને પોતાના હાઇ-ટેક પ્રાઇવેટ જેટ દ્વારા અમદાવાદ તરફ ઉડાન ભરી.
રાત્રિના પોણા બે વાગ્યા હતા. જેટ ૩૫,૦૦૦ ફૂટની ઊંચાઈએ ઇન્ટરનેશનલ એરસ્પેસ કાપી રહ્યું હતું. વિપુલ જેટની અંદર બનેલા ડિજિટલ ડેસ્ક પર કાયદાકીય દસ્તાવેજો તૈયાર કરી રહ્યા હતા. ગદ્દાર ગમે તેટલો પાવરફુલ હોય, પણ જો તેની સામે મજબૂત કાયદાકીય પુરાવા ન હોય તો તે બચી નીકળે.
વિપુલે કસ્ટમ્સ એક્ટ, NDPS Act હેઠળ એરપોર્ટ પર સીધી ધરપકડ અને સર્ચ વોરંટના ઈમરજન્સી ઓર્ડર્સ દિલ્હીથી ઓથોરાઈઝ કરાવી લીધા હતા. તેમની નજર ઘડિયાળના કાંટા પર હતી. ગ્લોબલ કાર્ગો પ્લેન અમદાવાદ લેન્ડ થવામાં હવે ગણતરીની મિનિટો જ બાકી હતી.
બરાબર રાત્રે અઢી વાગ્યે, વિપુલના પ્રાઇવેટ જેટે સરદાર વલ્લભભાઈ પટેલ ઇન્ટરનેશનલ એરપોર્ટ, અમદાવાદના રનવે પર સાયલન્ટ લેન્ડિંગ કર્યું. એરપોર્ટ પર સામાન્ય પેસેન્જર ટર્મિનલ શાંત હતું, પણ પાછળ આવેલો 'એર કાર્ગો ટર્મિનલ' ધમધમતો હતો. વિશાળકાય કાર્ગો વિમાનોમાંથી માલસામાન ઉતારવામાં આવી રહ્યો હતો. ફોરક્લિફ્ટ ગાડીઓનો ગણગણાટ અને હાઇ-ટેક સ્કેનર્સની બીપ લાઈટો ચાલુ હતી.
વિપુલ પોતાની ક્રાઇમ બ્રાન્ચની ખાસ સશસ્ત્ર ટીમ અને આઈ.બી.ના વફાદાર કમાન્ડોઝ સાથે કાર્ગો ઝોનમાં દાખલ થયા. તેમની પાસે રહેલા સ્પેશિયલ સેન્ટ્રલ કાર્ડને કારણે એરપોર્ટ સિક્યોરિટી (CISF) એ પણ તુરંત જ રસ્તો આપી દીધો. વિપુલે કસ્ટમ્સના સીનિયર ઓફિસરને બોલાવીને ઓર્ડર બતાવ્યો, "કાર્ગો ટર્મિનલના ગેટ નંબર ૪ ને તુરંત જ સીલ કરો. બેંગકોકથી આવેલી ફ્લાઇટ નંબર BC-909 ના કન્ટેનર્સ કોઈ કસ્ટમ્સ ક્લિયરન્સ વગર બહાર ન જવા જોઈએ."
ત્યાં જ રનવે પર એક મોટું, કાળા રંગનું બોઇંગ કાર્ગો પ્લેન લેન્ડ થયું. તેના પર વિદેશી સપ્લાયર કંપનીનો લોગો હતો. પ્લેનના પાછળના હિસ્સામાંથી મોટા લોખંડી કન્ટેનર્સ હાઇડ્રોલિક ક્રેન દ્વારા નીચે ઉતારવામાં આવ્યા. આ કન્ટેનર્સ પર કાગળિયાં મુજબ 'હાઇ-ટેક મેડિકલ ઇક્વિપમેન્ટ્સ અને ઇલેક્ટ્રોનિક્સ પાર્ટ્સ' લખેલું હતું, જે સામાન્ય રીતે કસ્ટમ્સ ચેકિંગ વગર સીધા પાસ થઈ જતા હોય છે.
વિપુલે પોતાની Sig Sauer v2 રાઇફલ કસીને પકડી અને કમાન્ડોઝને કન્ટેનર્સ ઘેરવાનો ઈશારો કર્યો. કસ્ટમ્સના ગાર્ડ્સે હાઇ-ટેક હાઇડ્રોલિક કટર લાવીને કન્ટેનરના સીલ તોડવાનું શરૂ કર્યું. લોખંડ કપાવાનો તીવ્ર અવાજ અને તણખા આખા એરપોર્ટના શેડમાં ફેલાઈ ગયા.
જેવો જ કન્ટેનરનો મોટો લોખંડી દરવાજો ખુલ્યો, અંદર રહેલો માલ જોઈને કસ્ટમ્સ ઓફિસરોના હોશ ઊડી ગયા. કન્ટેનરની અંદર મેડિકલ મશીનોની આડમાં હજારો નાના વૉટરપ્રૂફ બોક્સ ગોઠવાયેલા હતા. વિપુલે એક બોક્સ ખોલ્યું. તેની અંદર લાખોની સંખ્યામાં બ્લુ કલરની સિન્થેટિક ગોળીઓ હતી—એ 'યાબા' (Yaba) અને મેથામ્ફેટામાઇનનો અત્યાર સુધીનો સૌથી મોટો કન્સાઇનમેન્ટ હતો, જેની કિંમત આંતરરાષ્ટ્રીય માર્કેટમાં ૫૦૦ કરોડ રૂપિયાથી વધુ હતી! આ માલની સાથે જ હાઇ-ટેક મિલિટ્રી ગ્રેડ સેટેલાઇટ જામર્સ અને સાયબર એટેકના સિગ્નલ રિપીટર્સ પણ છુપાવેલા હતા.
"બહુત અચ્છે, ઇન્સ્પેક્ટર વિપુલ... તેં ખરેખર બહુ શાર્પ ઇન્વેસ્ટિગેશન કર્યું," પાછળથી અંધારામાંથી એક જાણીતો, ઘેરો અને કટાક્ષભર્યો અવાજ ગૂંજ્યો.
વિપુલે તુરંત જ ફરીને જોયું. એર કાર્ગોની પીળી લાઈટના પ્રકાશમાં જે ચહેરો સામે આવ્યો, તે જોઈને વિપુલના પગ નીચેથી જમીન સરકી ગઈ. એ વ્યક્તિ કોઈ સામાન્ય ઓફિસર નહોતો... એ મુંબઈ આઈ.બી. ઓફિસનો એ જ લાચાર દેખાતો 'ઓફિસર પાટીલ' હતો! પણ અત્યારે તેના ચહેરા પર કોઈ લાચારી નહોતી, તેના હાથમાં સાયલન્સર વાળી ગ્લોક પિસ્તોલ હતી અને તેની પાછળ એરપોર્ટના જ ચાર સશસ્ત્ર સિક્યોરિટી ગાર્ડ્સ કમાન્ડો પોઝિશનમાં ઊભા હતા.
"પાટીલ! તું?" વિપુલના અવાજમાં આઘાત હતો.
"હા વિપુલ... હું જ એ અદ્રશ્ય ગદ્દાર છું," પાટીલ ક્રૂરતાથી હસ્યો. "તને શું લાગ્યું, મુંબઈ ઓફિસમાં એ ધમકીભર્યો મેસેજ કોઈ માઇક્રો-ડ્રોને આપ્યો હતો? એ મેસેજ મેં પોતે જ મારા લેપટોપથી ટાઈપ કરીને તારી સામે મોકલ્યો હતો, જેથી તું ડરીને કેસ છોડી દે. પણ તું દિલ્હી પહોંચી ગયો. આ કરોડોનું ડ્રગ્સ અને ક્રિપ્ટોનું સામ્રાજ્ય હવે મારા ઇશારે ચાલે છે.
અય્યર સરને લાગે છે કે તેઓ દેશ બચાવી રહ્યા છે, પણ આ એરપોર્ટથી આ માલ સીધો સિંધુ ભવનના 'બ્લેક ઓર્કિડ' કાફેમાં જશે અને ત્યાંથી આખા દેશમાં ડિસ્ટ્રિબ્યુટ થશે."
પાટીલે પિસ્તોલનું નિશાન સીધું વિપુલની આંખોની વચ્ચે સેટ કર્યું. વિપુલની ટીમની બંદૂકો પાટીલ તરફ હતી, પણ પાટીલના માણસોની બંદૂકો કન્ટેનરના કેમિકલ ડ્રમ્સ તરફ લોક હતી. જો એક પણ ગોળી ચાલે, તો આખું એરપોર્ટ ટર્મિનલ બ્લાસ્ટમાં ઊડી જાય તેમ હતું.
પાટીલે ટ્રિગર પર આંગળી કસી, "ગુડબાય, ઇન્સ્પેક્ટર વિપુલ... તારું 'ઓપરેશન સેવન સિસ્ટર્સ' અહીં જ દફન થાય છે!"
*(ક્રમશઃ...)*
આપના રીવ્યુ જરૂર આપજો.
આપને મારી બીજી નવલકથા ઓ અને વાર્તાઓ વાંચવી ગમશે તો આપ મારા પ્રોફાઈલ ને સર્ચ કરવા વિનંતી.
